انزاب خوئی
درین دوشونجه لی شاعیر و یازیچی دوستوم " علیرضا ذیحق " جنابلارینا اتحاف
انزاب خوئی
درین دوشونجه لی شاعیر و یازیچی دوستوم " علیرضا ذیحق " جنابلارینا اتحاف
گل اؤپوم شاعیریم آل دوداقیندان
هر شربت دن شیرین بال دوداقیندان
مرجان لار ، اینجی لر سال دوداقیندان
هیممَت وارسا قارتال قانادی سینماز
بیرگون لاله له نَر سولغون یاناق لار
ظالیم لر باشیندا سینار چاناقلار
چکر گئده ر چاغریلمامیش قوناقلار
داش یاغارسا ، قارتال قانادی سینماز
ناحاق یئره قاداخلانیب دیر دیلیم
هیرناق لار قالیبدیر دایاق سیز ائلیم
آی ائلیمین دیلی ، جانیم سئوگیلیم
یئل قوپارسا ، قارتال قانادی سینماز
دامجی لار ، دامجی لار سَرت داشی دَلَر
" نوولوق " اولار بیرگون اینجه شیوکه لر
قویونلار سودله نَر قوزولار مَلَر
بولوت سارسا ، قارتال قانادی سینماز
من قوربانام ، سؤز آنلایان اینسانا
سؤزو سؤزدن سئچه مطلبی قانا
جانیم قوربان اولسون آذربایجانا
گؤی شاخارسا ، قارتال قانادی سینماز
"بوداق لار جئیرانی " کؤنلومو آچدی
اوخودوم سینه دن غم کدر قاچدی
بو اودلو سینه مه ایفتیخار ساچدی
یاغیش – قارسا ، قارتال قانادی سینماز
من عاشیقه م دوشموشه م دیل دن دیله
حسرت دن گؤز یاشیم دؤنوبدور سئله
گؤندردیم گول چیچک سنه بیر سَله
فلک یارسا ، قارتال قانادی سینماز
5/4/ 1385