شعری از اسماعیل لطفی / سنین ایشیق لیغین / ترجمه از فارسی به ترکی : علیرضا ذیحق

شعری از اسماعیل لطفی / سنین ایشیق لیغین / ترجمه از فارسی به ترکی : علیرضا ذیحق

 

vشعری از اسماعیل لطفی / سنین ایشیق لیغین / ترجمه از فارسی به ترکی : علیرضا ذیحق

سن

چوخ اوزاق ایدین

چیراغی سؤندوردوم

و گئجه نین قارانلیغین دا

بیر گوندوز گئجه نین

 قارا بوجاغینا سؤیکه ندیم .

بیر کؤهنه ائوین دیوارینا

دایانمیش کیمی ،

اؤزومو باغریما باسدیم

و ال لریم جاده نین بوینونا آسیلدی.

سنین چؤهره ن ، گئجه و شَهَر

بیر- بیرینده ن سئچیلمه میش

 رسیم کیمی ایدی

قارلی بیر گون

 گؤروشدویوموز سایاق،

و قیش

 ماوی یه چالان

 دامارلاریندا یئری ییردی .

ای ائوین بالاجا چیلیک بارماغی

هئچ بیر ماهنی سؤیله مه دن

سورمالی بیر مامپاس* ایسته رکن

اوشاقلیغیمی اؤپوب

منی دویونجا آغلاتدین

و هئی گؤز تیکدیم

دیوا ردان ساللانمیش مئوآغاجی نین

یارپاقلی – یارپاقسیز بوداق لارینا ،

و ایشیم اولدوکوچه نی کسیب دورماق... 

گؤزلریم وورغون ایدی

 سنین مؤحتشم جلالینا

و ال لریم اوزانمیشدی

کوچه نین جانینا

آمما قوجاغیم دا تکجه من ایدیم

و سن  ده بیرسئحیرلی رسیم ایدین

 یاغان یاغیش دان

کی دونموش ال لرین قولتوغوم دایدی .

قیش مئوسیمی... آه قیش ...

نه اینصاف سیزجا

تور خودون

من یالنیزین، اونودولموش آدینا.

جاده لرده مین لر چیراغین

 ایشیلتی سی وار

شراب اول خاتون ،

و بالاجا ائویمین سئرچه لرینه

میضراب اول سسله ن

 " داوود" ون آوازیندا.

سئرچه جیک لر ده حیرت ده دیلر

سن سیزاولان

 ال لرین شاختاسیندا.

بوداق لاردا یاتیرلار

ومن اؤزوم ده

قیرمیزی کاپشئن

و سورمه ای شالوارلا

بَنزیردیم قیش گونلرینده

رسیمه چئوریله ن بیر قیزا .

جاده سوروردو اوزومون اوستونه

منیم ده ایسته ییم ، تکجه یاتماق ایدی .

 ایسماعیل،

ایسماعیل،

ایسماعیل،

ایسماعیل ده  قاییدیب

و اوتاغین  بیر بوجاغیندا

 اوره ک درمانی له ،

چکدی یی آه ایله و قره قوره کاغیذلاریله  

پوزقون و یورقون دوشموش دی .

ایسماعیل

یول دان چیخمیش بیر ماشین دادی

اؤز حالیندا اولسادا،  جان اوسته دی

و جاده ، اوزون و ایسلاق دیر .

گئجه دیر آنجاق

ندنسه من آمما گؤرمه دن ده

 یاناقلاریندا کی نارلارا گؤز تیکمی شه م .

ائوه قاییدیب

یاناقلارینی خاطیرلارکن

 بیر رومان یازمالی ایدیم

تاریخ ده کی بوتون،

 سوسوزایسماعیل لردن .

گرک ائوه دؤنه ردیم

واوجاق اوسته کی

 تَزه دم آلمیش چای دان

بیر خورتوم ایچردیم

و " شکسپیر " ین دورو شئعیرلرین دن

سنه ، ایچدیره یدیم .

وسن گونون چیخماسینا با خارکن

 من ده گؤزلرینی

شراب کیمی عطیرلندیره یدیم .

بیلیرسن می

قارین یاغماسی یاخین دیر ؟

و منیم ماوی رنگلی توخونما شالیم

هله نه سنین بالاجا  سئحیرلی ال لرینه

بیر ماهنی قوشوب ،

نه یولوموز اوستونده اولان آغاجلارا کی

قیش گونلری ده اینسانی حئیرته سالیر .

داها نه دئییم کی

ائوی نیزین ده خبری وار ...

بیلیرسن کی اینسان

یونگول جه بیر چَرپَلَنگ ** دیر

کی سانجاق لانیب یئره .

و من

کپه نک لری دوزوره م

اوزون ساچلی

 وقارا رنگلی زولف لرینه !

گرک ائوه قاییدیب

و سنی بیرماهنی یا چئویره ردیم .

ندنسه سنده ،

غضب لی سن

یئنه دوروبسان اوزاقلاردا...

سن اولمادان ، سن سیز ائوین شرابی دا

اینان کی

توپراقین کؤهنه قوخوسدور .

گرک کی ساعتین عقربه لرین

گؤزلری نین ایچینده

یئنی دن فیرلادام ...

1403- بهمن آیی

----------------

* مامپاس ، فارسجادا آبنبات دئییلیر.

* چرپلنگ ، فارسجا دا بادبادک دئییلیر . البته چرپلنگ عوضی ، اوچورتما دا دئیه رلر.