شعر ترکی / باکی یا سفر / علیرضا ذیحق / əliriza zihəq - şeir

علیرضا ذیحق

باکی یا سفر  / شعر

علیرضا ذیحق

باکی یا سفر

قوجاق – قوجاق ایشقدیر

دنیزه قوناق ،

گمی لر کؤچ سالیب

خزره گئجه .

بیاض لیق نورساچیر

ساوریلیر گؤیه

نه گؤزل سن باکیم نه گؤزل !

قیزلارین بختور ، گولوش قایناغی

اینسانلار صاف زولال بولور چشمه سی

جاوان لار داشی ییرعشقین یوکونو

سعادت جارلاییر

هربیر سئوینج ، بایراقین .

شعیرین صنعتین واردیر حورمتی

نه فیکیرلر یاساق دیر نه ده دویغولار

موسیقین جان وئریر یورقونا ، خسته یه عاشیقه

جانیمسان ، گؤزوم سن سئویملی باکیم .

دالغالار دریانی تیتره دن کیمی

گؤروب قوجماغین

 تیتره دیردی منی

آراز دان کئچه رکن آند ایچدیم اینان

 بیر اوووج تورپاغینی

سایریشان پارلایان اولدوز لار سایاق

بورج ائدیب  قبریمه

ساورولاراق

باهار گلیب

مینیم سئوگیم گول آچا  .

گزیب دولاشسام دا چوخ بیر دییاری

گؤرمه دیم سن تک گؤزل آی باکی !

یئدیم دوستلارین دوزون اکمه یین

داددیم سویونو گؤردوم اوزونو

سیماندا سما دا بوتون واری نان

سسله ییردی یاشا جان آذربایجان .

آزادلیق وورغونو من تک اینسانا

یاشاییش آهنگ اولوب

سعادتیم تام .

دوغما دیلده سئوگیلی سین سسله ین

اؤپوش لر وئره ن آداخلی قیزلار

چیمنده اوینایان غونچالی گول تک

عطیرلر ساچیردی حیاتا اینان

ساچلار دالغا دالغا  کوله یه قوناق

نه شادلیق یاساق نه گولمک باکی !

نصیبیم اولمادای گنجه نن قازاخ

حسرتیم یاشادی اؤتَن ایللر سایاق

گله بیل لم می یئنه گؤرَم اونلاری ؟

قورخورام یاشلانام آیاق گلمه یه

آیاق گلسه ده عؤمور یئتمه یه

نیسگیل لر چولقایا اوره یی جانی .

سومقاییت آما بیر جنت تکین

باغریمین باشیندا بیر خاطیره قویدو

اینجه یورد اولدو هر باغی چیچه یی

دؤیونن چیرپینان اوره ییمله من

ایلیاس پیغمبرین پادیشاه لیغین

عدالته سئوگی یه قارداشلیغا

خزرین ساحیلینده بیر گونش گؤردوم

نئجه کی بیر اینجه  رنگلی پروانه

سئحیرلی ووقارلی وارلیغی نان

منی اؤز یوردونا قوناق ائیله دی ،

اونوتمارام  خاطیره نی سومقاییت .

دؤنرکن تبریزه خویا

داغلارین کمرلی اَتک لرینده

بیر آغ کمر گؤروب وورغونو اولدوم

یادا سالدیم

باکی نی ، نیظامی نی بولواری

ایچرَی شَهَرده کن

داریشلیق کوچه لری

او نار کیمی ائلین گؤیچه یین

قیزقالاسی دا

بیر خاطیره اولدو .

مین اولدوز گؤردوم بیر مزاردا من

اؤپدوم هربیرین بیر سجده گاه تک

سولئمان روستمی عوزه ییر به یی

شعیرلر اوخورکن نغمه لی گؤردوم

رشید بهبودووون او بؤیوک اینسانین

ماهنیسی نی بیر پرچم تک

 دونیانین هر داغیندا آسیلی گؤردوم .

هله لیک دوستلاریم هله لیک !

بیزیم ده بورادا شهریاریمیز وار سهند یمیز وار

غئیرت مکانی تبریزیمیز وار زنگانیمیز وار

 "وورغون" ون آداشی بهرنگی میز وار

چایلاریمیزدا

اُقیانوسا یول دؤین

بیر بالاجا قارا بالیق

کیتابلارجا ناغیلیمیز وار

چؤره یین حؤرمتی

آذربایجانین شؤهرتی

تورک دیلی نین

 آد سانی وار !

مین خاطیره اولدو بیر خاطیره

هله لیک دوستلار ،

دوعا ائدین ائله اوبایا

بوردا کولک یامان اَسیری.

2022