مارال ( قصه ها ، شعرها و یادداشت های علیرضا ذیحق)
نقل مطالب ترکی و فارسی این وبلاگ در مطبوعات، کتب و شبکه های اجتماعی با ذکر نام نویسنده بلامانع است. alirezazihagh@gmail.com
مارال ( قصه ها ، شعرها و یادداشت های علیرضا ذیحق)
نقل مطالب ترکی و فارسی این وبلاگ در مطبوعات، کتب و شبکه های اجتماعی با ذکر نام نویسنده بلامانع است. alirezazihagh@gmail.comقصه ای به زبان ترکی ( همراه با متن فارسی )/ درین لیک لر/ حیکایه / علیرضا ذیحق
علیرضا ذیحق
دَرین لیک لر
حیکایه
بیرینجی دفعه کی تصمیم توتدو اینتَحار ائده ، قیرخ نئچه ایل بوندان اؤنجه ایدی . سونرادا باشی ائله قاریشدی کی داها هئچواخت اینتحارا فیکیرلش مه دی . اوچاغلار اینتحاری نین سببی هر نه اولدوسا ، بیر شئی اونو حیاتا باغلادی . اودا قوشباز اولدوغو ایدی . اونسوز قوشلاری دیدرگین قالیب هره سی بیر یانا داغیلاجاق ایدی . اوره یین دن گلمه دی اونلاری اؤز سایه سیندن محروم ائده . آما بو دفعه دوروم فرق ائدیردی و قوشبازلیقیی ترگیتمیشدی .
علیرضا ذیحق
دَرین لیک لر
حیکایه
بیرینجی دفعه کی تصمیم توتدو اینتَحار ائده ، قیرخ نئچه ایل بوندان اؤنجه ایدی . سونرادا باشی ائله قاریشدی کی داها هئچواخت اینتحارا فیکیرلش مه دی . اوچاغلار اینتحاری نین سببی هر نه اولدوسا ، بیر شئی اونو حیاتا باغلادی . اودا قوشباز اولدوغو ایدی . اونسوز قوشلاری دیدرگین قالیب هره سی بیر یانا داغیلاجاق ایدی . اوره یین دن گلمه دی اونلاری اؤز سایه سیندن محروم ائده . آما بو دفعه دوروم فرق ائدیردی و قوشبازلیقیی ترگیتمیشدی . یاخشی کی فیکیرله شیردی داها هئچ بیرسایه سی قالمامیشدی کی بیری نین باشینا کؤلگه سالسین . آیلیق بیر معاشی وار ایدی کی او اولایدی یا اولمایایدی عائیله سینه یئتیره جک ایدی و اولماماسی نین یاخشی لیقی او ایدی کی بیر چؤره ک یئیه ن عائیله دن آزالیردی . یئنی دن اینتحار ائتمه سبب لری ده چوخ ایدی . اؤنجه ایسته میردی بوندان دا آرتیق قوجالا ، سونرا بوکی آرزولاری نین هئچ بیرینه کی پول لا اونلارا یئتیرمک اولایدی یئتیرمه میشدی . بیرده بو کی دونیا قاتیشمیش دی و هریاندان اؤلوم خبری ایدی کی گلیردی و قان تؤکمک اینسانلارین عادتی اولموشدور . بیر سیرا آداملار بو دوشونجه ده ایدلر کی بیر اینتحار جیلیققاسی باغلاییب اونو پاتلاتماقلا کوچه بازار داکی جماعتی قانا بله ییب جنت ین اورتاسیندا اونا یئر وئره جک لر و دونیانین هر یئریندن بولبول لرین چح چح سسی قولاغا چاتاجاق دیر. بونودا اونوتماماق کی اونون اینتحار قراری بیر تَهَرلر ، اؤنجه کی اینتحاری نین سبب لرینه باغلی ایدی . اودا " شهلا " یا اولان سئوگی سی ایدی .او واختلار اون یئددی یاشی وارایدی و بیرگون خبری اولدی کی شهلا اَره گئدیببدی و اودا دلی ساساق باشینی قاپ – باجایا چیرپیپ آز قالیردی هئچ هئچی نن اؤزونه اؤلدوره کی بیرده بیرده قوشلاریندان بیری چیی نینه قونارکن اونلارین فیکرینه دالدی . اونسوز کیمسه قوشلارا صاحاب چیخیب دن سو وئرمه یه جک ایدی و دوشوندو کی اینتحاری سونرا یا بوراخیب بیر یول تاپا کی هم قوشلار راحات لی یالار همده آسان بیر اؤلوم سئچه کی چوخ عذاب چکمه یه . تاکی یاشاییشین آخاری و اونون چتین لیک لری و لذت لری ، اینتحار ائتمه دوشونجه سینی بوسبوتون یادیندان چیخارتدی .
دوزدور کی یاشلانمیشدی آما هئچ زامان گوناه لار باتلاقینا دوشمه میشدی . کیتاب اهلی ایدی آما حساب اهلی دئییلدی و جیب لری نین چینه دانی هم مه شه بوش ایدی و بو بابت دن ده اذیت چکیردی . آما یئنی دن ا وندا قورلانان ایننحار قیغیلجیم لاری یئنه شهلانان باشلامیشدی . شهلانی کی ایندی اورتایاشلی بیر دول قادین ایدی یئنه سئویردی و اوزاق دان اوزاغا اوندان خبر توتوردی . ائشیتمیشدی کی بیر نفر شهلایا ائلچی دوروب اودا بلی دئمیشدی . بودا کی عیالوار ایدی و آزقالا نوه لری ائوله نیردیلر بیر ایش اَلیندن گلمیردی و شهلا یئنه یابانجی لار اَلینه دوشوردی . اودور کی فلسفی فیکیرلره دالدی و باشاردیقجا اینزی وایا جومدو . آما تا ایستیردی بیر دینج یئر تاپیپ راحاتلایا آروادی نین باش قولاغی تاپلیپ اونو کوببالارکن جومدوغو دونیادان آییریردی .
بو سفر آما ایش جیددی ایدی و ایستیردی بیر تَهَر یاخاسینی قورتارا . اینتحار اوچون گئتدی بیر هوتئلین حوووضونا و لاپ درین لیک لری سئچیب بو فیکری نن کی اؤلولر قوجالمازلار ، اؤزونو آتدی سویا . اوزمک باشارمادیقی اوچون آز قالیردی بوغولا کی او بو بیله سینی نجات وئردیلر و گئجه نی اوتوردو باشدان گئچن لری کاغاذ اوستونه گتیره کی آرودای یئتیریب یامان یوغوز دئیه رکن دفتر قلمی نی باشینا چیرپدی . نییه کی چیراغین ایشیغی اونون یوخوسونو قاتیب آییلدیردی . اودا بیر سؤزه باخیم اوشاق کیمی ، دینمه دن باشینی آشاغی سالیب گیردی یاتاغینا و صوبحه جان بو فیکیرده ایدی کی کاش بیر اینتحار جلیققاسی گئییب گئده ردی اوجا بیر داغین باشینا و بیر وولقان کیمی پاتلاییب آلوولاناردی .
1396
متن فارسی داستان " درین لیک لر " را اینجا بخوانید .